კავკასიური როჭო ენდემიკოსია. მაღალი მთების ეს ბინადარი უმთავრესად კავკასიონისა და მათგან განშტოებულ მთებზე ცხოვრობს ტყის ზემო ზონაში და სუბალპური ზონის მაღალ ბალახეულში ზღვის დონიდან 1800-2500 მეტრის სიმაღლეზე. მამალი როჭო მთლიანად შავი ხავერდოვანი ბუმბულითაა დაფარული. წითელი წარბები ამშვენებს მას, ნისკარტი და ფეხები მუქი ძვლისფერი აქვს, ტანი ლამაზი კუდით მთავრდება. დედალი როჭო უფრო რუხი ჟანგისფერია, გრძელი კუდით. როჭო 10 კვერცხს დებს და 6-7 წიწილას ჩეკს. კავკასიურ როჭოზე ნადირობა მეტად საინტერესოა, მაგრამ ამასთან ერთად დიდ სიძნელეებთანაცაადაკავშირებული, მონადირისგან მოითხოვს მაღალ მთებში, ციცაბო ფერდობებზე ფეხსაცმლის ძირზე მაგრად მიბმული წრიაპებით ოსტატურად სიარულს და რაც მთავარია, მონადირის ჯანის სისაღეს, განსაკუთრებით გულისას. ამიტომ მონადირეების უმრავლესობისათვის ამ ძვირფას საწერაო ფრინველზე ნადირობა მხოლოდ ოცნებას წარმოადგენს. კავკასიური როჭოს მოსაპოვებლად საჭიროა 4-5 ნომერი საფანტი.
